Një tjetër bankomat është sulmuar nga maskat. Rasti në fjalë është shënuar një ditë më parë në Bulqizë, ndërsa policia ka reaguar në kohë reale, duke bërë të mundur kapjen e dy grabitësve. Shtetasit me inicialet E.A., 31 vjeç, dhe F.L., 35 vjeç, të maskuar dhe me sende të forta, tentuan të vidhnin bankomatin e filialit të një banke të nivelit të dytë në “Lagjen e Re”, Bulqizë.
“Tentuan të vidhnin një bankomat të një filiali banke të nivelit të dytë, falë reagimit të shpejtë dhe profesional të policisë, identifikohen dhe vihen në pranga autorët e dyshuar.
Specialistët për Hetimin e Krimit në Komisariatin e Policisë Bulqizë, në bashkëpunim me DVP Dibër, arrestuan shtetasit E.A., 31 vjeç, F.L., 35 vjeç, banues në Bulqizë (të dy të dënuar më parë për veprën penale të “Vjedhjes”).
Këta dy shtetas, në bashkëpunim me njëri-tjetrin, në orët e para të mëngjesit të datës 26.01.2019, të maskuar dhe me sende të forta, tentuan të vjedhin bankomatin e filialit të një banke të nivelit të dytë në “Lagjen e Re”, Bulqizë.
Materialet hetimore i kaluan Prokurorisë Dibër, për veprën penale “Vjedhja e bankave dhe arkave të kursimit”, kryer në bashkëpunim e mbetur në tentativë, parashikuar nga nenet 136/2 dhe 25 e 22 të Kodit Penal”.
