Në kërkim për rreth 2 miliardë dollarë, turk Faruk Fatih Özer sipas mediave vendase rezulton të jetë i fshehur në Shqipëri. Madje, CNN turk ka publikuar foto teksa Özer, themeluesi i kompanisë Thodex bën “Check In” në një prej hoteleve në Tiranë. Mediat turke shkojnë edhe më tej kur shkruajnë se ai po fshihet nga mafia shqiptare kundrejt ryshfetit. I riu i kërkoi motrës së tij më 18 prill të gjitha dokumentet e kompanisë dhe dy ditë më vonë u arratis në Shqipëri. Özer iku nga Turqia me këto dokumente dhe miliona dollarë para kripto që fitoi duke mashtruar 400 mijë njerëz. Sipas të dyshuarve, dëshmia e të cilëve u mor në hetim, 5 drejtuesit e ndërmarrjes që ishin në arrati ishin të vetëdijshëm se Özer do të shpëtonte.
Arratisja
Megjithëse Özer tha se u largua jashtë vendit me qëllimin për të gjetur një partner të huaj, vlerësohet se ai vendosi të arratisej pas hetimit të nisur nga Zyra e Kryeprokurorit Publik Anadoll të Stambollit. Me njoftimin e kuq të lëshuar nga autoritetet turke, CNN shkruan se Özer arriti t’i shpëtojë policisë shqiptare dhe 4 ekipeve turke të policisë falë ryshfetit. Nuk ka asnjë provë që Özer u largua nga Shqipëria, kështu që konsiderohet se ai ende fshihet në këtë vend, vijon agjencia. Më tej thuhet se policia shqiptare kreu një hetim gjithëpërfshirës për arrestimin e Özerit, të gjithë ata që kishin kontaktuar që kur ai hyri në vend u ndoqën dhe informacioni që vinte në linjat e denoncimit u vlerësua menjëherë. Theksohet se Özer i kushton vëmendje të mos përdorë asnjë pajisje komunikimi teknologjik dhe se ka shokë rreth tij që e udhëzojnë se ku do të shkojë dhe me kë do të takohet. Sipas mediave turke, në fotografitë pranë hotelit, Özer shoqërohej edhe nga një person tjetër me pallto të kuqe, shtetas shqiptar, i cili e priti në aeroport dhe e çoi në hotel. Mësohej se personi me një pallto të kuqe ishte kërkuar nga policia shqiptare mes të dyshuarve.
Arrestimet në Turqi
Në hetimin e nisur më 22 prill nga Kryeprokurori Publik Anadoll, 78 nga 82 të dyshuarit, ndaj të cilëve ishin lëshuar urdhër-arreste, u arrestuan. Përpjekjet janë duke u zhvilluar për kapjen e 4 të dyshuarve të arratisur, përfshirë themeluesin dhe menaxherin e Thodex, Faruk Fatih Özer.
Aludimet për pengmarrje
Një ditë më parë gazeta turke “cumhuriyet” bëri të ditur se, dy motoçiklistë kishin parë një makinë misterioze me targa 06 AGA, brenda të cilës u fut 27-vjeçari turk. Themeluesi i “Thorex”, 27 – vjeçari Faruk Fatih Özer, është kthyer kështu në një telenovelë lajmesh në Turiqi, ndërkohë që kërkimet dhe hetimet janë fokusuar tashmë në Shqipëri, ku mendohet se mund të kenë kaluar një pjesë e mirë e parave të përfituara prej tij. Ai akuzohet për mashtrimin e më shumë se 400 mijë qytetarëve dhe, sipas mediave turke, dyshohet se Özer ka pasur lidhje me grupe kriminale në Shqipëri. Dyshohet se Özer mund të jetë mashtruar nga mafia shqiptare për të udhëtuar drejt Shqipërisë. Lëvizjet e befta të kursit të këmbimit hedhin dyshime pë futjen e valutës nga Özer dhe miqtë e tij.
