Tradhtia e një 20-vjeçareje me një 34-vjeçar, e që përfundoi me vdekjen e këtij të fundit, ka shokuar mbarë opinionin publik. Esat Cani, vëllai i shtetases Elida Cani, ka rrëfyer detaje tronditëse në rajonin e policisë për çfarë ka ndodhur ditë më parë, dhe se çfarë strategjie kishin bërë për të fshirë gjurmët. Për të kryer krimin, ai ka përdorur një shufër hekuri 50-60 centimetra, të cilën e përdorte i ati për të çarë gurë. Ai ka thënë se kishte shkuar në shtëpinë e së motrës, dhe e ka pritur tek porta e kashtores. Tek porta kishte dalë Arben Gjeçi, i cili kishte nisur të qeshte me ironi. Mesa duket, në revoltë e sipër e ka goditur me hekur pas koke dy-tre herë. Pasi e ka goditur Arbenin, ai është drejtuar në shtëpinë e tij, dhe hekurin e ka hedhur midis hapësirës së kotecit dhe kashtores.
“Në këtë kohë unë kam shkuar në shtëpinë time, në oborr kam marrë një shufër hekuri 50-60 centimetra, e cila në fund ishte shtypur. Këtë hekur e përdor babai dhe unë për të çarë gurë. Pasi mora hekurin, shkova pas shtëpisë së motrës dhe kam ndenjur te porta e kashtores. Në këtë moment kam parë te dera, ku depërtonte drita, një hije që lëvizi. Në këtë kohë u hap dera dhe doli te porta, e identifikova, ishte Arben Gjeçi, më pa mua dhe filloi të qeshte me ironi.
Unë në këtë moment, ngaqë ai ishte i gjatë, i kam bërë dy hapa mbrapa dhe e kam goditur me hekur mbas koke dy-tre herë. Mbasi e kam goditur Arbenin, kam ikur qetësisht në shtëpinë time dhe hekurin e kam hedhur midis hapësirës së kotecit dhe kashtores. Kur kam shkuar në shtëpi, më pyeti babi se pse isha i mërzitur, unë thashë se nuk kam gjë dhe shkova të fle.
Ditën tjetër, te shtëpia ka ardhur djali i xhaxhait A.C. dhe më ka thënë se kishin gjetur Arben Gjeçin të vrarë në rrugë, unë thashë se nuk dija gjë. Nuk kam pasur për qëllim të vras Arben Gjeçin, por doja ta rrihja që të vuante ca kohë”.
Gjykata e Tiranës vendosi dje masën “arrest me burg” për Esat Canin, i cili akuzohet se ka vrarë me sende të forta Arben Gjecin. Po kështu, Gjykata vendosi “arrest shtëpie” për motrën e tij Elida Cani dhe të fejuarin e saj Dëfrim Kurti. Të tre u arrestuan për vrasjen e ndodhur pak ditë më parë në Zall Bastar. Autori i dyshuar i krimit, Esat Cani, ka rrëfyer se ishte bashkëshorti i Elidës, Dëfrim Kurti, ai që kishte zbuluar tradhtinë. Të dy të rinjtë kishin vendosur të mbanin nën vëzhgim 20-vjeçaren, për ta kapur në flagrancë me të dashurin.
