Gazetarja Klodiana Lala, në një emision televiziv, ka zbardhur dinamikën e masakrës së Dobraçit në Shkodër.
Sipas Lalës, ngjarja në Dobraç, Shkodër, që fillimisht u raportua si aksident, rezultoi një atentat i mirëorganizuar, ku u qëllua me rreth 50 plumba ndaj automjetit ku ndodheshin Hamza Lici dhe Arlind Bushati. Të dy viktimat u gjetën të armatosur, ndërsa në vendngjarje u sekuestruan disa armë dhe gëzhoja. Lici mori 17 plumba, ndërsa Bushati, një të tillë fatal në kokë.
Një orë pas ngjarjes, u gjet një automjet i djegur, që rezultoi të ishte përdorur nga autorët dhe ishte vjedhur më parë në Durrës. Hetimet zbuluan lidhje mes viktimave dhe grabitësve të automjetit, duke ngjallur dyshime për përfshirjen e grupeve kriminale. Makina e autorëve u gjurmua në një zonë pranë banesës së Asmer Bilalit, një personazh i njohur në botën e krimit.
Gjatë hetimeve, u zbuluan komunikime të fshira dhe lëvizje të dyshimta të lidhura me këtë ngjarje. Vizitat e shpeshta të Bilalit në burg nga i afërmi i tij, si dhe sekuestrimi i sendeve të paligjshme, përfshirë një celular, shtuan misterin. Prokuroria dyshon për një bashkëpunim kriminal mes bandave për të eliminuar Licët dhe Bushatët.
Masakra e Dobraçit lidhet gjithashtu me një tjetër ngjarje kriminale në Vaun e Dejës, ku përplasjet mes grupeve Sakica, Bajri dhe Bilali shfaqen si shkak kryesor i konflikteve. Kjo ngjarje vazhdon të jetë objekt i hetimeve për të identifikuar porositësit dhe ekzekutorët.
