Një person i armatosur ka vrarë deri në 10 persona në një supermarket Walmart në Chesapeake, në shtetin amerikan të Virxhinias, thotë policia. Një burrë që besohet të jetë menaxheri i dyqanit hapi zjarr, më pas ktheu armën kundër vetes ku dhe ka vdekur.
Qyteti i Chesapeake shkroi në Twitter: “Policia konfirmon një incident aktiv të të shtënave me viktima në Walmart”.
Ka pak detaje, por një oficer policie foli për jo më shumë se 10 persona të vrarë dhe shumë të plagosur. Asnjë motiv nuk ka dalë.
Policia u tha gazetarëve se sulmi ndodhi në orën 22:12 me orën lokale. Pamjet në rrjetet sociale tregojnë praninë e madhe të policisë në vendngjarje.
Zëdhënësi Leo Kosinski tha se të shtënat besohet të kenë ndodhur brenda dyqanit, dhe se i dyshuari ka vepruar i vetëm.
Një zëdhënës i Spitalit të Përgjithshëm Sentara Norfolk u citua nga stacioni televiziv lokal WAVY-TV duke thënë se pesë persona po trajtoheshin atje. Një grua i tha WAVY-TV se vëllai i saj, një punonjës 20-vjeçar i dyqanit, u qëllua vetëm 10 minuta pasi kishte hyrë në punë.
Por ajo tha se vëllai i saj ishte në gjendje të fliste me të afërmit dhe të dërgonte mesazhe – duke thënë se kjo ishte “ngushëlluese”.
Një grua tjetër e quajtur Joetta Jeffery i tha “CNN” se nëna e saj kishte qenë brenda ndërtesës kur ndodhi sulmi dhe kishte arritur të dërgonte mesazhe me tekst.
Zonja Jeffrey tha se nëna e saj nuk ishte lënduar, por ishte në shok.
Mark Warner, një senator demokrat për shtetin e Virxhinias, shkroi në Twitter se ishte “i sëmurë nga raportet për të shtënat masive”.
Senatorja e shtetit të Virxhinias, L. Louise Lucas, gjithashtu një demokrate, shtoi se ajo ishte “absolutisht e thyer në zemër”.
Ajo shkroi në Twitter: “Nuk do të pushoj derisa të gjejmë zgjidhjet për t’i dhënë fund kësaj epidemie të dhunës me armë në vendin tonë”.
Sulmi i së martës në mbrëmje vjen vetëm disa ditë pasi një person i armatosur hapi zjarr në një klub nate LGBT në shtetin amerikan të Kolorados, duke vrarë 5 persona dhe duke plagosur 17 të tjerë.
Burimi i lajmit: BBC. Përshtatur nga Tirana Today
