Masa të forta sigurie kanë rrethuar Shkupin prej mbrëmjes së mërkurës në pritje të seancës së fundit gjyqësore për rastin e Kumanovës.
Kështu, Ministria e Brendshme e Maqedonisë ka përforcuar masat e sigurisë dhe kontrollet në pjesët hyrëse të Shkupit, si dhe janë ndërmarrë edhe masa të tjera në bllokimin e disa rrugëve.
“Për shkak të seancës për Lagjen e Trimave të Kumanovës, komunikacioni rreth gjykatave do të bllokohen përkohësisht dhe do të destinohet lëvizja në akset e tjera rrugore”, ka informuar MPB e Maqedonisë.
Mësohet se policia ka shtuar masat e sigurisë edhe në rrugët e tjera nga Manastiri e Prilepi, ku pjesa më e madhe e grupit janë dërguar atje për të vuajtur dënimin, ndërsa eskorta e të akuzuarve nga burgjet e këtyre qyteteve gjatë çdo seance kanë ardhur me masa të forta sigurie si helikopterë dhe transportues të blinduar.
Shumë qytetarë kanë shtangur për shkak të këtyre masave të forta të sigurisë, duke pyetur se çfarë ka ndodhur.
Për këtë proces gjyqësor, raporton INA, janë harxhuar rreth 3 milion euro sepse për mbajtjen e një seance janë harxhuar mbi 50 mijë euro për angazhimin e një numri të madh të forcave policore, ekipe dhe helikopter.
