Ditën e sotme, Prokurorja e Përgjithshme e përkohshme, Arta Marku ka zhvilluar një sërë takimesh.
Fillimisht, ajo priti në Prokurorinë e Përgjithshme ambasadorin amerikan Donald Lu, takim ky i cili zgjati rreth 30 minuta. Duhet thënë se takimi mes ambasadorit dhe kryeprokurores ishte një takim “i ngrohtë”, teksa Lu është larguar nga Prokuroria mjaft i qeshur.
Por, pas takimit me Donald Lu, Marku është prezantuar me vartësit e saj në Prokurori. Mësohet se kryeprokurorja u ka kërkuar vartësve të vazhdojnë hetimet e nisura dhe të ndëshkojnë shkelësit e ligjit.
Por, cilat janë kompetencat e saj?
Prokurori i Përgjithshëm i përkohshëm ka tre kompetenca derisa të krijohet KLP-ja, të cilat janë; e drejta për të pezulluar prokurorët, e drejta për të bërë vettingun, si dhe vlerësimi i aftësive profesionale.
Megjithatë, teksa Marku është një zëvendësuese deri në krijimin e KLP-së, ajo nuk ka kompetencat e Adriatik Llallës, teksa cështjet e mëdha do ua lërë prokurorëve për shqyrtim.
Edhe Fatos Klosi e ka deklruar një gjë të tillë, teksa është shprehur se me “peshqit e mëdhenj” do të merren prokurorët:
“Ne do kemi raste ta shikojmë, por kryeprokurorja do jetë e detyruar që të japë shpjegime. Me ‘peshqit e mëdhenj’ do merren prokurorët. Ajo do i lejojë ata. Kjo do sillet ndryshe se nuk ka kompetencë të tillë. Ai bëri që të dështojnë të gjitha çështjet e mëdha në vend. Llalla kishte kompetenca. Po të ishte Llalla s’do kaloje dot”, tha Klosi.
Edhe në ligjin 97/2016 “Për organizimin dhe funksionimin e Prokurorisë”, në nenin 109, pika 2 thuhet se: Në rast se mandati i i Prokurorit të Përgjithshëm përfundon përpara kohe, përpara krijimit të Këshillit të Lartë të Prokurorisë, funksionet e Prokurorit të Përgjithshëm, me vendim të Kuvendit, caktohet t’i kryejë përkohësisht një nga prokurorët me më shumë eksperiencë në radhët e prokurorëve dhe që përmbush kushtet dhe kriteret e kreut IV, seksioni I, të këtij ligji.
