Restauratorja Marinela Ndria tashmë gëzon një tjetër post me mjaft peshë. Ministrja e Kulturës, Elva Margariti njofton me anë të një postimi në faqen zyrtare në Facebook se Marinela Ndria është drejtorja e re e Arkivit Qendror Shtetëror të Filmit.
“Me bindjen se ky institucion do të fokusohet edhe më shumë në fushën e restaurimit të pasurisë filmike që ruhet në të, me synimin final të ngritjes së një muzeu #filmi, i urojmë suksese Marinelës në detyrën e saj sa të bukur edhe të vështirë!”, njofton Margariti.
Emërimi i saj në krye të Arkivit Qendror Shtetëror të Filmit vjen pasi vendi ka qenë vakant pas lirimit nga detyra të ish-drejtoreshës Iris Elezi.
Shkarkimi i kësaj të fundit u bë në tetor të vitit të kaluar, pas një konflikti interesi në ushtrimin e funksionit publik. Arkivi Qëndror Shtetëror i Filmit shqiptar (AQSHF – Shqipëri) është institucion nën varësinë e Ministrisë së Turizmit, Kulturës, Rinisë dhe Sporteve.
