Marin Mema është “Njeriu i Vitit” nga klikimet në faqen e internetit të Tirana Today. Gazetari i Top Channel, Mema ka marrë më shumë klikime mes shumë personazheve të shumtë në sondazhin e hapur që Tirana Today zhvilloi në faqen e internetit.
Gazetari Mema ishte i ftuar sot në redaksinë e Tirana Today, ku u mbajt një ceremoni e vogël për dhënien e çmimit. Drejtori i fondacionit “Fundjavë Ndryshe”, Arbër Hajdari ishte personi që i dha çmimin “Njeriu i Vitit” gazetarit Marin Mema.
Pas marrjes së çmimit Marin Mema tha “ju falenderoj jashtëzakonisht për çmimin dhe mbi të gjitha që shpenzoni kohën tuaj në iniciativa kaq pozitive që duhet të rriten sa më shumë. Të rinjtë kanë gjithmonë e më shumë nevojë që të përfshihen në iniciativa të tilla të lënë të bërit opozitë nëpër kafe, dhe të kundërshtuarit nëpër kafe. Kemi nevojë që të reagojmë, që të ndihmojmë njëri tjetrin, që të tërheqim njëri tjetrin. Nuk behët Shqipëria ndryshe. Unë ju falenderoj jashtëzakonisht shumë”.
Në momentet e ndarjes së çmimit, drejtori i “Fundjavë Ndryshe”, Hajdari u shpreh “më vjen mirë që kam nderin të jap një çmim kur në fund të gjithë bashkë na bashkon një qëllim. Ne vijmë nga fusha të ndryshme por kemi qëllim që të ngremë moralin e shqiptarëve, të tregojmë të vërtetën e shqiptarëve, që nuk jemi të rastësishëm dhe që këtë vend të begatë nuk na e falën. Por shumë burra e gra kanë luftuar që ne sot, pavarësisht se akoma nuk jemi të lirë se varfëria na ka marrë peng, por po e gëzojmë këtë vend dhe na duhet shumë punë për të arritur Bashkimin Evropian.”
Gjithashtu, i ftuar në këtë ceremoni ishte dhe publicisti dhe gazetari i njohur Agim Baçi i cili tha se “këtu janë dy këndvështrime shumë interesante të Shqipërisë; njëra është ajo që Marini e ka quajtur “Shqipëria tjetër”, por që në fakt është Shqipëria jonë dhe nuk është tjetër. Por vetëm ashtu mund ta dallosh sepse ajo është Shqipëria që ne e kemi lënë pas dore, që nuk e kemi prekur fare. Dhe Marini na zgjon që ta shohim sepse sot, po nuk e dha media nuk ekziston fare. Marini na ka zgjuar për të na thënë se është dhe një gjë tjetër që në duhet që ta shikojmë. Gjithashtu, tjetra është me Arbër Hajdarin i cili na ka zgjuar një Shqipëri tjetër që duket se e kishim harruar. që është për mua motori më i madh në botë, solidariteti.
Personazhi i dytë më i klikuar është këngëtarja shqiptare Dua Lipa, ndërkohë kryeministri Edi Rama në këtë sondazh u rendit i treti. Personazhet e vitit janë përzgjedhur disa nga personalitetet më në zë që lanë gjurmët e tyre për vitin 2017. TIRANA TODAY
Kush është Marin Mema
Marin Mema është diplomuar për gazetari në korrik të vitit 2003 pranë Departamentit të Gazetarisë në Fakultetin e Histori-Filologjisë të Universitetit të Tiranës. Gjithashtu, ka fituar një Master për Shkenca politike dhe marrëdhënie ndërkombëtare.
Mema punon aktualisht gazetar pranë Departamentit të Informacionit në Top Channel dhe boton rregullisht opinione në disa të përditësime. Prej vitit 2009 është realizues i ciklit te reportazheve “Shqipëria Tjetër” që transmetohen në Top Channel dhe Top News. Marin Mema është realizues gjithashtu i një sërë dokumentarësh si ai “Shqiponjat kufitare” për shqiptarët në Sanxhakun e Serbisë, Gjurmët e historisë për zonat dhe fshatrat e shqiptarëve në Greqi (Bellkamen, Negovan, Follorine, Kostur) Çameria, përse kanë frikë grekët (ku jepet jeta e sotme në këto zona dhe gjurmët që nuk janë shuar) Manastiri në Maqedoni, Sarajevo në Bosnje, Ulqini, Plava dhe Gucia, Reka, Dibra e madhe, komunitetet shqiptare në SHBA, Itali, Greqi, Maqedoni, Mal të zi, Serbi, Turqi e më tej kanë qenë në fokus të dokumentarëve dhe reportazheve. Në gusht 2012 është shpallur non grata nga shteti Grek si pasojë e emisioneve të tij.
Gazetari mema është njëkogësisht dhe publicist, ai ka botuar edhe dy libra. I pari “Qetësi shurdhuese” i botuar në vitin 2003 dhe libri me poezi “Çmenduria e fundit” i botuar në vitin 2004
Marin Mema ka fituar disa çmime në gazetari ku vlen të përmendet çmimi “Hasan Prishtina”.
