Deputeti i Partisë për Drejtësi, Integrim dhe Unitet, Bujar Muça ka dhënë dorëheqjen nga mandati i përfaqësimit në Kuvend. Vendin e tij pritet që ta zërë Elena Xhina e cila renditej e treta në listën e kandidatëve për deputetë nën siglën e PDIU në qarkun e Elbasanit. 
Në intervista të mëparshme Elena Xhina ka thënë se modeli i saj në politikë është ish- kryeministrja britanike, Margaret Thaçer, e cila ka venë në kornizë figurën e femrës si njerëzore, por duke mos anashkaluar vlerat femërore. Duke e ngritur në pediestal figurën e femrës, e cila dinte të ishte dhe e vendosur dhe e hekurt, por njëkohësisht dhe e butë dhe femërore.
Kush është Elena Xhina për të gjithë ata që nuk e njohin?
Elena Xhina ka përfunduar studimet për drejtësi në Elbasan. Për 10 vjet ka ushtruar profesionin e avokates. Aktualisht është nënkryetare e Këshillit të Qarkut, prej 2 vitesh, dhe prej 4 vitesh punon si pedagoge e jashtme në universitetin “Aleksandër Xhuvani”. Elena Xhina ka fituar titullin doktore shkencash në vitin 2016.
