Kuvendi i Maqedonisë miratoi të mërkurën me 69 vota pro, asnjë kundër dhe asnjë abstenim marrëveshjen për emrin e ri të vendit me Greqinë.
Opozita maqedonase nuk mori pjesë në seancën e sotme.
Në fjalimin e tij, Kryeministri Zoran Zaev tha se për ratifikimin e marrëveshjes me Greqinë do të jenë qytetarët ata që do të japin vendimin përfundimtar për çështjen e emrit.
“Para tre ditëve nënshkruam dokument për t’i dhënë fund çështjes tre dekadëshe. Kemi nënshkruar fillimin e fundit të paqartësive. Zgjidhje e dinjitetshme për të dyja palët. Gjuha dhe identiteti nuk do të shkelen nga marrëveshja”, deklaroi Zaev.
Zaev kërkoi mbështetje nga deputetët duke thënë se kjo është një ditë e madhe për Maqedoninë.
“Kjo ditë e bën të qartë se do të marrim datë për fillimin e bisedimeve me BE-në”, deklaroi Zoran Zaev, kryeministër.
Deputeti i BDI-së Artan Grubi, i cituar nga Alsat –M, tha se “jeta të mëson se vendimet duhet t’i sjellësh në kohë të duhur, jo vonë, por në kohë të saktë. Sot është koha e vendimit më të vlefshëm për të ardhmen tonë të përbashkët. Vendimi i sotëm na sjell datë për negociata me BE-në dhe ftesë për anëtarësim në NATO”.
