Deri të premten do të ketë detaje dhe do të qartësohen pozicionet e fundit të palëve në procesin për zgjidhjen e kontestit të emrit. Siç bëhet e ditur, mes kryeministrave Zoran Zaev dhe Aleksis Cipras do të ketë një bisedë telefonike, por nuk përjashtohet edhe një takim i përbashkët në Prespë për të finalizuar detajet e marrëveshjes së fundit të arritur në Bruksel mes ministrave të jashtëm Nikolla Dimitrov dhe Nikos Kocias, informon INA.
Kryeministri Zaev dje deklaroi se ende asgjë nuk është kryer dhe se po bëhen përpjekje. Sipas tij, do të ketë një hap para në këtë proces pasi që politikanët që kanë besimin e popullit duhet të marrin përgjegjësi për zgjidhjen e problemeve. Ai tha se më në fund do të jenë qytetarët që do të japin mendimin e tyre përmes referendumit, që pritet të mbahet në shtator.
Edhe kryeministri grek Cipras deklaroi se ka sinjale për zgjidhjen e kontestit të emrit. Megjithatë presidenti Gjorgje Ivanov tha se nuk do të jetë e pranueshme për të një zgjidhje “erga omnes”. Në tryezën e bisedimeve dhe pakon e ndërmjetësit Nimic po negociohen këto emra “Republika e Maqedonisë së Re”, “Republika e Maqedonisë Veriore” dhe “Republika e Maqedonisë së Epërme”. Pas arritjes së marrëveshjes janë paraparë disa hapa, ku vendi do të marrë ftesë për në NATO dhe datën për hapjen e bisedimeve me BE.
