Ditën e sotme Komisioni për Çështje të Imunitetit dhe Mandatit ka vendosur në unanimitet heqjen e mandatit për 6 deputetët e arrestuar, si të dyshuar për ngjarjen e 27 prillit.
Kështu, deputetëve Krste Mukoskin, Ljuben Arnaudov, Sasho Vasilevski, Zhaklina Peshevska, Ljupço Dimovski dhe Johan Tarçullovski, u hiqet imuniteteti për t’i hapur më pas rrugë paraburgimit të tyre.
Seanca u hap nga kreu i Komisionit, Pavlle Bogoevski, ndërsa mungonin anëtarët e OBRM-PDUKM-së.
Sipas Rregullores së Kuvendit, pasi të mbarojë diskutimi në komision, për vendim përfundimtar duhet të vendosë Parlamenti në seancë plenare.
Kështu, komisioni e nis kërkesën tek kryetari i Kuvendit, Talat Xhaferi i cili duhet të organizojë seancë plenare dhe të votohet nga deputetët për këtë kërkesë.
Vendimi për arrestimin e deputetëve duhet të votohet nga të paktën 61 deputetë.
Megjithatë, Policia e Maqedonisë është ende në kërkim edhe të 12 personave, të cilët do të merren në pyetje nga Gjykata Penale në lidhje me ngjarjet në Kuvend më 27 prill.
Sipas ministrit të Punëve të Brendshme, Oliver Spasovski, policia ka njohuri se 12 personat janë në shtet:
“Kemi njohuri se nga 12 personat, disa kanë shtetësi të dyfishtë. Më shumë informacione nuk mund të jap”, tha Spasovski.
