Në disa zona në Maqedoni vazhdon të mbetet problematik furnizimi me ujë të pijshëm, për rreth 100 mijë banorë.
Në dallim me vendbanimet rurale që kanë probleme të caktuara me ujin e pastër, në vendbanimet urbane me përjashtime më të vogla nuk ka probleme më të mëdha me konsumin e ujit të pijshëm.
Sipas Raportit të Institutit për Shëndet Publik të Maqedonisë për vitin 2016, objektet lokale për furnizim me ujë, si pompa, bunarë dhe çezma fshati, akoma janë në përdorim si burim kryesor i ujit për pije për 98.266 banorë.
Në këto fshatra në vitin e kaluar janë kryer 120 kontrolle dhe janë marrë 1159 mostra për analiza, ku 236 prej tyre kanë treguar rezultate jo të rregullta lidhur me parametrat fiziko-kimike, edhe atë kryesisht për shkak të ujit të turbullt dhe pranisë së shtuar të nitrateve.
47 PËR QIND E MOSTRAVE ME PROBLEME BAKTERIOLOGJIKE
Nga ana tjetër, 47 për qind e mostrave të ujit nuk i përgjigjen normativave në aspektin bakteriologjik.
Analizat e rezultateve për ujin e pijshëm në Maqedoni, në përgjithësi tregojnë se në periudhën 2002-2016 përqindja e mostrave jo të rregullta sipas analizës kimiko-fizike lëviz prej 2.9 deri në 7.6 për qind, ndërsa përqindja e mostrave të parregullta sipas analizës bakteriologjike lëviz prej 0.8 deri në 2.99 për qind.
