Që pas ndeshjes së fundit të Premier Leagues çështja më e diskutuar në shtëpinë e Chelsea ishte shkarkimi i teknikut italian, Antonio Conte. Pas disa muajsh spekullime sot ka ardhur edhe shkarkimi i tij. Conte në vitin e parë në Angli ka fituar kampionatin me Chelsea, ndërsa në sezonin e dytë gjërat “i dolën nga duart” dhe ekipi i drejtuar nga ai nuk arriti dot dhe zonën Champions.
Zëvendësi i tij pritet të jetë një italian tjetër, ish-trajneri i Napolit, Maurizio Sarri. Një emër mjaft i pëlqyer nga manjati Abramovic. Pas shkarkimit të Contes emërimi i Sarrit në krye të Bluve është çështje orësh.
Megjithëse Conte kishte filluar fazën përgatitore te Chelsea, ai tani duhet ta ndërpresë dhe të bëjë gati valixhet. Kjo është hera e nëntë që Roman Abramovich do të paguajë një shumë të madhe për të larguar trajnerin. Conte do të fitojë 9 milionë euro nga ky shkarkim.
