Ish-ministri i Drejtësisë, Ylli Manjani ka bërë një analizë ku kritikon publikisht ambasadorët e huaj.
Në një postim në Facebook, Manjani bën një ‘bilanc ambasadorësh’, teksa shkruan se donin ta luftonin drogën dhe korrupsionin, por ato u thellua edhe më shumë.
“Do na hapnin negociatat po të miratohej reforma në drejtësi, por na hapën kokën me deklarata. Negociatat jo e jo. Dështim!”, shkruan ndër të tjera Manjani, e në fund jep mesazhin se shtetin e demokracinë duhet ta ndërtojmë ne vetë këtu, me mençuri dhe jo me sytë nga ambasadat.
Postimi i plotë:
Bilanc ambasadorësh:
1. Donin të luftohet droga, por u përhap si kurrë më parë. Kanabisim as e panë fare. Dështim!
2. Donin të luftonin Korrupsionin, por është thelluar edhe më shumë. Dështim!
3. Donin drejtësi të pavarur, por sot është më e varur se kurrë nga qeveria. Për më tepër, mbyllja gjykatave e ka bërë qeverinë “legjitime” në çdo paligjshmëri. Dështim!
4. Donin të arrestohen ministra, por u mbrojtën e po dalin të pafajshëm. Dështim!
5. Donin të arrestohen të fortët e të kërkuarit, por veç Shullazi që u dorëzua vetë se të tjerët ikën. Dështim!
6. Do na hapnin negociatat po të miratohej reforma në drejtësi, por na hapën kokën me deklarata. Negociatat jo e jo. Dështim!
Ka edhe të tjera, por këto janë kryesoret. Ishin çështje që u përfshinë vetë ambasadorët e huaj (SHBA e BE) ku “dhanë garanci” se këto gjera do bëhen!
U përfshinë në mënyrë të jashtëzakonshme, por dështuan në mënyrë po aq të jashtëzakonshme!
Të gjithë ata që vijojnë të flasin për “Washington e Bruksel” duhet të kuptojnë se e kanë kot. Shqipëria është aq e vogël sa nuk merr dot vemendje.
Ne vlejmë sa një deklaratë që e harton zyra përkatëse e shtypit e nivelit më të ulët. Shpesh ajo deklaratë nuk ka lidhje me Shqipërinë reale, por thjesht me Shqipërinë politike.
Ndaj duhet mbledhur mirë rradakja për të ndërtuar shtetin e demokracinë ne këtu. Duhet ta bëjmë vetë, por jo me forcat tona.
Duhet ta bëjmë me mençuri, siç e kanë bërë të tjerët para nesh. Askush se ka bërë shtetin e demokracinë me ambasadorë e as me sytë nga ambasadat për të shkëputur ndonjë deklaratë të favorshme.
Nuk ka zgjidhje perfekte nga jashtë. Faktet tregojnë se edhe ata dështojnë!
Por kusuret i mbajmë ne…
