Ish-ministri i Drejtësisë Ylli Manjani, me anë të një statusi në “facebook” ka komentuar fitoren e rivalit të tij politik edi Ramës.
Manjani në këtë shkrim ironizon fitoren e Ramës duke thënë se e fitoi bastin por sukses nuk i uroj dot, sepse nuk fitoi zgjedhjet, por bastin. Gjithashtu, Manjani i rit dozat e ironisë duke shkruajtur se nuk fitoi programi, por barsoleta dhe nuk e fitoi kryeministrinë, por i mbeti në dorë.
Në fund të fjalës së tij ai thotë se me rëndësi është organizimi i Shqipërisë opozitare pasi pa opozitë diktatura monopartiake do ta ketë krejt të lehtë të bëjë ç’të dojë.
Statusi i Manjanit
Ky është i pari bast që fitoi Edi Rama. Disa ditë më parë shkruajta që “nëse e fiton këtë bast, ta gëzojë Shqipërinë”! Sot e përsëris: Ta gëzojë Shqipërinë! Sukses nuk i uroj dot, sepse nuk fitoi zgjedhjet, por bastin! Nuk fitoi programi, por barsoleta! Nuk e fitoi kryeministrinë, por i mbeti në dorë! Ai donte të qeveriste vetëm, ja ku ja arriti kësaj dite! E ka të gjithë tepsinë për vete! Ta hajë deri sa të fryhet! E ardhmja?! Nuk e di! Askush se di! Dyshimet janë stërmunduese! Nuk pritet gjë e mirë! Idetë e rrezikshme të tij mbi demokracinë, liritë dhe sundimin e ligjit, vështirë të kenë pengesa! Shteti do jetë krejt në dorë të tij! Nuk ka më asnjë alibi që dikush po e pengon! Sa për blerjen e votave: jam i bindur që janë blerë! Me para në dorë dhe relativisht masivisht! Kanabis solli potencial te madh financiar! Por, fajin më së pari e ka ai që e shet votën! ‘‘Shitësi’’ i votës është shitësi i demokracisë. Ky është rregulli bazë i logjikës. Të tjerat janë stërhollime politike e ligjore! Nëse njerëzit e shesin lirinë e demokracinë, ka mbaruar çdo logjikë e mëtejshme! Blerësit ndjehen ‘‘legjitimë’’ t’i nxjerrin ujët e zi çdo gjëje! Kundërshtarët e Ramës duhet të kërkojnë arsyet e kësaj gjendje tek vetja dhe jo tek të tjerët. E sigurt është që fituesi kishte strategji më të mirë. Kërkimi i ‘‘fajit’’ tek sondazhet nuk ndihmon! Fakt është që sondazhini IPR Marketing dhe Ora Neës, me pak saktësime doli korrekt! Me rëndësi tani është organizimi i Shqipërisë opozitare! Pa opozitë diktatura monopartiake do ta ketë krejt të lehtë të bëjë ç’të dojë! Duhet të kthejmë zgjedhjet në alternativë dhe jo në bast! Bastet i fiton gjithmonë pushteti!
