Kuvendi i Shqipërisë ka kryer dje një manipulim të pastër gjatë votimit për ligjin e Teatrit. Seanca e drejtuar nga Gramoz Ruçi ka përfshirë në procesin e votimit edhe deputetin e LSI-së i cili nuk ishte në sallë.
Denoncimi ka ardhur nga kreu i grupit parlamentar të LSI-së, Petrit Vasili. Ky i fundit i bën thirrje Ruçit që të rivotohet ligji, ndërsa kërkon nga kryeprokurorja Marku një hetim të hollësishëm.
Në të kundërt sipas tij, Kuvendi ka rënë dhe Prokurorja është shndërruar në një mashë të kryeministrit Rama.
“Dje mazhoranca manipuloi votimin e ligjit për teatrin. Deputeti Vangjel Tavo që mungonte në seancë rezulton votues. Ky është një manipulim banditesk dhe vjedhje votash edhe brenda sallës së Kuvendit nga po ata që vodhën votat në 25 qershor. Ky votim është nul dhe Kryetari i Kuvendit Ruçi duhet të deklarojë që sot anulimin e votimit dhe përsëritjen urgjente të votimit, përndryshe ai si institucion ka rënë juridikisht, politikisht dhe moralisht. Prokurorja e përgjithshme të fillojë hetimin për këtë vepër penalë shumë të rëndë të manipulimit të votimit parlamentar. Tanimë hajdutët e votave janë ulur këmbëkryq në parlament dhe në krye të qeverisë. Nëse prokuroria mbyll sytë edhe përpara kësaj atëherë çdo qëndrim ndaj saj është plotësisht legjitim.”shkruan Vasili në rrjetin e tij social, Facebook.
