Mane i papërmbajtshëm, Liverpool “manita” Portos (Video)

Liverpool prek çerekfinalen vetëm pas 90 minutash, pasi ka shkatërruar në transfertë gjigantët portugezë të Portos në transfertë 5-0. Ndeshja nisi në ritme të qeta por vetëm pas minutës së 20’ anglezët gjejnë rrugën e rrjetës e më pas nuk dinë të ndalen.

Në mesin e pjesës së parë, Saido Mane realizoi golin e avantazhit për miqtë, duke përfituar edhe nga një reagim i dobët i portierit vendas Jose Sa. Katër minuta pas golit të parë, Liverpool gjeti të dytin me anë të Mohamed Salah, i cili tregoi momentin e jashtëzakonshëm të formës që po kalon duke shënuar me gjakftohtësi pas një “palexho” të topit me katër kohë. Ky ishte goli numër 30 i Salah për Liverpool në të gjitha veprimtaritë, vetëm 1 gol larg rekordit të Luis Suarez me 31 gola në sezonin 2013/14.

Porto nuk tregoi agresivitetin e duhur për të reaguar në asnjë moment dhe kjo bëri që pjesa e dytë të ishte një pasqyrë e së parës. Liverpool gjeti edhe golin e tretë, sërish me anë të Saido Mane, që tundi rrjetën duke shënuar golin e tretë.

Kur kishin mbetur 20 minuta lojë Firmino kompletoi “pokerin” e britanikëve, ndërsa goli i pestë mban sërish firmën e Mane, autor i një “triplete” që vulosi fatet e ndeshjes dhe të kualifikimit.