Vjen një tjetër reagim nga ndërkombëtarët lidhur me vendimin e opozitës për të djegur mandatet.
Grupi parlamentar gjerman CDU-CSU, ka reaguar me një deklaratë për situatën politike në Shqipëri. Në deklaratën e zëdhënësit të saj Florian Hahn, thuhet se integrimi në BE i Shqipërisë tashmë ndodhet nën re të errëta, pasi Shqipëria po humbet besueshmërinë tek miqtë europianë.
“Shqipëria për momentin është duke luajtur shumë me kredibilitetin tek miqtë evropianë. Në rast se perspektiva për çeljen e negociatave për në BE në mesin e vitit të kaluar ishte ende rozë, tani po shfaqen re të zeza. Protestat e aktuale në Tiranë pengojnë qeverinë, si dhe paralizojnë funksionimin e parlamentit. Protestat dhe demonstrtratat bëjnë pjesë tek të drejtat e njeriut dhe janë një tipar dallues i demokracisë, në rast se ato zhvillohen në mënyrën e duhur. Por deputetët e partive tona partnere në Shqipëri i bëjnë një shërbim të keq (autogol) qëllimit të tyre, nëse nëpërmjet dorëzimit masiv të mandateve do të shkaktojnë një stanjacion politik dhe do të nxisin protesta të dhunshme. Një qëndrim refuzues nuk i shërben as vendit, as qytetarëve.
Prandaj ju bëj thirrje miqve tanë në Shqipëri për vetëpërmbajtje. Qeveria dhe opozita duhet të zhvillojnë menjëherë bisedime, në mënyrë që të rifillojë funksionimi i parlamentit dhe të rivendosen marëdhënie të qarta. Perspektiva evropiane është vënë në rrezik.”- deklaron zëdhënësi i CDU/CSU gjermane.
