Djajtë e kuq janë në Spanjë për të sfiduar Celta Vigon për fazën gjysmëfinale të Europa League.
Ekipi i Jose Murinos, Europa Leaguen ka të vetmen mundësi që të mos e shpallë sezonin të dështuar. Fitoren e këtij kompeticioni, Manchester United e shikon si një mundësi për t’u buzëqeshur tifozëve.
Por, Celta Vigo nuk është një ekip që toleron në fushën e saj. Celta Vigo, nga ana tjetër, e shikon si një mundësi reale fitoren e Europa Leagues, për të mbyllur sezonin në mënyrën më të bukur.
Në një intervistë për “Times” sulmuesi i Celta-s, John Guidetti, zbuloi se si trajneri Eduardo Berizzo është përpjekur t’i motivojë lojtarët e tij për këtë sfidë.
“Trajneri foli sot me ne, dhe tha: ‘Dëgjoni, United ka 15 fusha trajnimi, ne kemi një, ata kanë avionë privatë, ne fluturojmë me mbështetësit tanë. Kemi një stadium të vogël, ata kanë 75,000 vende. Kanë lojtarë me vlerë sa dhjetë prej nesh. Por kujt i intereson, sepse kjo nuk ndryshon asgjë’. Kjo është bukuria e futbollit, gjithçka është e mundur”, – përfundoi John Guidetti.
Celta Vigo dhe Manchester United përballen në orën 21:05. Celta Vigo vjen nga forma 1 fitore, 1 barazim dhe 3 humbje. Ndërkohë, Manchester United nga 2 barazime dhe 3 fitore. Djajtë e kuq janë favorit për kalimin në finale, por Celta Vigo mund të bëjë atë që bëri kundër Realit të Madridit në Kupën e Mbretit, duke i eliminuar.
