Manchester United ka treguar një formë mjaft të dobët në ndeshjet që po zhvillon në SHBA, në fazën përgatitore. Ka qenë vetë trajneri portugez, Jose Mourinho që e ka pranuar këtë fakt dhe u ka kërkuar disa lojtarëve kryesor që të kthehen më shpejt nga pushimet. Kjo kërkesë ka qenë pikërisht për Pogba, Lingard, Lukaku e Fellaini, të cilët akoma nuk i kanë përfunduar pushimet, ndërsa ishte Jones dhe Rashford ata që i ndërprenë ato për t’iu bashkuar ekipit.
“Shpresoj që lojtarët që janë në pushime të merituara të kujdesen për formën e tyre dhe ndonjëri prej tyre të ndjekë shembullin e Rashford e Phil Jones që u bashkuan me skuadrën më herët nga sa e kishin parashikuar për të ndihmuar skuadrën”, tha Mourinho. “Në rast të kundërt do të jemi në telashe në fillimin e sezonit të ri”.
United ka dhe dy ndeshje miqësore për të luajtur, përballë Bayern Munich dhe Real Madridit, para se të fillojë sezonin e ri më 10 gusht, ku ndeshjen e parë në Premier League do ta zhvillojë përballë Leicesterit.
