Ne Komitetin Kombëtar të Ekspertëve për Testimin e Ndjeshmërisë Antimikrobike, Ministrja e Shëndetësisë Ogerta Manastriliu ka paralajmëruar zero tolerancë për tregtimin e antibiotikëve pa recetë.
Përdorimi pa kriter i antibiotikëve, është kthyer në një shqetësim serioz global. Manastirliu tha se nuk do të ketë tolerancë ndaj farmacive që i shmangen rregullit dhe ligjit, për sa i përket shitjes së produkteve dhe antibiotikëve apo barnave të cilat duhet të shiten vetëm nëpërmjet recetës së mjekut.
“Agjencia Kombëtare e Barnave dhe Pajisjeve Mjekësore, duhet urgjentisht të intesifikojë punën përsa i përket kontrolleve të farmacive të rrjetit të hapur, në raport me recetat që lëshohen për sa i përket antibiotikëve dhe verifikimin, nëse kanë antibiotikë të lëshuar pa recetë. Zero tolerancë për farmacitë të cilat i shmangen rregullit dhe ligjit për sa i përket shitjes së produkteve dhe antibiotikëve apo barnave të cilat duhet të shiten vetëm nëpërmjet recetës së mjekut”,
Gjatë mbledhjes u njoftua se do të ketë një plan kombëtar masash për antibiotiko-rezistencën. “Ka ardhur koha për të rivlerësuar planin e masave përsa i përket luftës kundër antibiotiko-rezistencës, me mësime të mësuara dhe të nxjerra nga Covid-19. Është shumë e rëndësishme që ky plan masash të fillojë menjëherë, duke patur disa objektiva konkretë”.
Ekspertët po punojnë që të ketë një sistem edhe për barnat që nuk janë me rimbursim, dhe që jepen nga mjekët si terapi mjekimi.
