Mali i Zi e quan të mbyllur çështjen e demarkacionit me Kosovën

Ambasada e Malit të Zi në Kosovë, në një prononcim për median, ka ritheksuar sërish se demarkacioni tashmë është çështje e mbyllur për Malin e Zi.
“Siç e dini qëndrimin e ministrit të Punëve të Jashtme të Malit të Zi, Srdjan Darmanoviq, i cili më herët ka deklaruar gjatë takimit me zëvendëskryeministrin dhe njëherësh ministrin e Punëve të Jashtme të Kosovës Behgjet Pacollin, se demarkacioni me Kosovën për Malin e Zi është çështje e përfunduar”, thuhet në përgjigjen e Ambasadës së Malit të Zi në Kosovë.
Më tutje në këtë përgjigje thuhet se Mali i Zi do të tregohet i durueshëm dhe do të presë që Kosova ta përfundojë këtë çështje në një periudhë të arsyeshme,shkruan zëri.
“Mali i Zi ka mirëkuptim për proceset e brendshme politike të Kosovës dhe do të tregojë durim në periudhën në vazhdim duke pritur që institucionet e Kosovës do të dëshmojnë kapacitet demokratik dhe do ta përfundojnë demarkacionin në një periudhë të arsyeshme”, thuhet më tej.