Shqipëria dhe Mali i Zi po punojnë së bashku për një studim paraprak fizibiliteti lidhur me autostradën Adriatiko-Joniane, ose e quajtur ndryshe “Korridori Blu”.
Ky është një nga projektet më të rëndësishme që lidhen me detyrat e SEETO-s dhe konektivitetin.
Gjatë studimit do të kryhen analiza të detajuara mbi investimin e mundshëm, prioritetet e ndërhyrjes, me qëllim bërjen e një projekti financiarisht të mundshëm për t’u mbështetur.
Ministri i Infrastrukturës dhe Energjisë, Damian Gjiknuri ishte dje në Podgoricë, ku zhvilloi bisedime bilaterale me Ministrin e Transportit dhe Marinës Osman Nurkovic dhe Ministren e Ekonomisë Dragica Sekulic ku u dhanë edhe detaje për këtë projekt.
“Diskutuam në lidhje me projektet e infrastrukturës rrugore ku të dyja vendet kanë si projekt prioritet autostradën Adriatiko-Joniane. Kemi marrë financimet e nevojshme për të bërë studimin përfundimtar të fizibilitetit. U njoha edhe me projektet e zhvillimeve infrastrukturore në Malin e Zi që ndikojnë drejtpërdrejtë edhe në lidhjen me Shqipërinë. Ngrita problemet që kërkojnë vëmendjen e palës malazeze për kompletimin e rrugëve të tjera dytësore që lidhin pika të tjera kufitare me Shqipërinë”, theksoi Gjiknuri.
Çfarë është Korridori Blu?
Autostrada Adriatiko–Joniane apo Korridori Blu është autostrada e të ardhmes që zgjatet përgjatë gjithë bregut lindor të Adriatikut dhe detit Jon duke u zgjatur deri në pjesën perëndimorë të Gadishullit të Ballkanit. Rruga nis nga Tireste në Itali, kalon përmes Sllovenisë, hyn në Kroaci afër Rijeka dhe del Trebinjë në Bosnjë përpara se të hyjë në Mal të Zi. Autostrada kalon në Podgoricë dhe më pas në Shkodër në Shqipëri për të vazhduar në Tirane-Durrës-Fier-Gjirokastër duke dalë nga Shqipëria për t’u lidhur me seksionin grek rrugës E55.
