Piktori dhe arkitekti i njohur Maks Velo, teksa ishte i ftuar këtë mbrëmje në emisionin “Provokacija”, ka folur po ashtu edhe për disidentët shqiptarë, ndërsa shprehet se njihen si të tillë edhe pse nuk kanë qenë.
Velo ka folur konkretisht për piktorin Edi Hila, për të cilin thotë se ka gënjyer duke u hequr si i burgosur politik. Sipas tij, Hila ka qenë shef i piktorëve te Piramida e Enverit. Ndërsa shton se jo vetëm që ka qenë pjesë e Partisë së Punës, por ka përfituar dhe bursë dhe ka dalë jashtë shtetit 3 herë, në atë kohë.
“Prandaj zuri vend kjo gënjeshtër, kjo poshtërsi e Edi Hilës. Edi Hila ka qenë i Partisë së Punës, ka qenë i realizmit socialist, ka qenë shef në Piramidë. Edi Hila ka dalë 3 herë jashtë shtetit. U çua me bursë në RAI. Të gjithë të dhënat e tij janë pro partisë. Nuk ka bërë as sot një deklaratë, as një rresht kundër realizmit socialist, kundër PP dhe është ai që tani i merr të gjitha të mirat”, deklaroi Velo.
“Këtu është një skenar i një regjisori Serxhio Gixhardi, belg, i cili më dërgon katër letra që nga 2001-2004 dhe sinopsin e një dokumentari që donte të bënte për Maks Velon. Dokumentari u bë dhe ku shkoi thoni ju, Edi Hila, Edi Rama. U shfaq dokumentari në Paris, dokumentar dedikuar Edi Hilës dhe Edi Ramës me paret që u dhanë për Maks Velon”, shtoi më tej ai.
