Gazetari i portalit “Reporteri” në Kosovë, Shkumbin Kajtazi, gjatë mesnatës është përballur me një sulm të rrezikshëm.
Ndaj mjetit të tij është qëlluar me rreth 6 plumba, që sipas tij, rasti lidhet me punën që bën. Ai raporton se ka dëgjuar krisma arme, dhe se ishte afër vendit ku ndodhi sulmi.
Në dëshinë që ka dhënë në polici, ka rrëfyer se ngjarja e rëndë lidhet me punën, ndërsa mjetin e kishte parkuar në qendër të Mitronicës. Gazetari e mbyll statusin duke paralajmëruar se ai nuk ndihet i frikësuar, por i dëshpëruar me shtetin dhe njerëzit e tij.
Statusi
Miq,
Mbrëmë u përballa me një sulm të rrezikshëm: vetura ime u qëllua me 5 ose 6 plumba.
Ngjarja ka ndodhur rreth mesnatës, kur vetura ishte e parkuar në qendër të Mitrovicës.
Unë isha afër dhe kam dëgjuar krisma arme, por si njeri naiv që beson se Kosova është vend normal, nuk e kam lejuar mendjen të më thotë se mund të jetë sulm i tillë. Isha gabim.
Kur u afrova tek vendi ku e kisha parkuar, pashë se vetura ishte dëmtuar në masë të madhe. Në fillim pata bindjen se ishte goditur me diçka të fortë, mirëpo më pas u vërejten gjithandej vrima dhe predha të plumbave: në ulësen e shoferit, në tavan e në pjesën e prapme.
Edhe në Polici deklarova se rasti lidhet me punën, pasi problem personal me dikë nuk kam pasur që nga shkolla e mesme.
Rasti është në Polici dhe shpejt do ta marrin në dorë hetuesit e krimeve të rënda. Zbardhja e tij duhet të bëhet shpejt, ose rrezikon të mbetet zhag si i mëparshmi.
Nuk ndihem i frikësuar, që është qëllim i personave që më vihen pas. Jam thjesht i dëshpëruar me shtetin tim dhe njerëzit e tij.
