Deputeti Ralf Gjoni sfidoi mazhorancën nga foltorja e Kuvendit. Ai i kërkoi shumicës që të pranojë ndryshimin e sistemit, e nëse kanë guxim që të futen në zgjedhje të parakohshme që këtë pranverë. Ai tha se mazhoranca po telekomandon votën e deputetëve opozitarë. Teksa seancën e shkuar deputetja Majlianda Halilaj bëri xhiron e rrjetit me gafat e shumta gjatë fjalimit të saj në Kuvend, sot deputeti Ralf Gjoni është ndalur te mënyra se si u interpretua në media. Me tone ironike, ai tha se askush nuk u mor me debatin për Korporatën, por me gafat e Majlindës. Kujtojmë se kjo e fundit u justifikua me faktin se kishte probleme me syrin, ndaj lexonte në atë formë.
Tronditi Kuvendin me fjalimin e saj, ‘zëvendësja’ e Bashës: Gabimet janë për njerëzit
“Ne të mos presim që shqetësimet që sjellim, të merren në konsideratë si politika. Ne mund të vijmë të llapim pa fund dhe asnjë nga këto probleme të mos merret në konsideratë, se paska mekanizma të tjerë në Parlament. Ky është shqetësimi kryesor i shqiptarëve.
Asnjë nga kërkesat e shqiptarëve nuk merret parasysh nga kjo shumicë. Zonja drejtuese e seancës, shumica është gjithnjë e më shumë arrogante. Ne këtu jemi të cunguar, se nuk janë përmbushur të gjitha vakancat dhe këta sillen prapë si korporatë, si shoqëri klienteliste aksionerësh.
Majlinda duhet të ngrihet si fenomen, foli kundër korporatës, ngatërroi fjalët, çfarë nuk u tha këtu dhe në media, se Majlinda pavarësisht se e lexoi gabim fjalimin, votoi kundër korporatës së Investimeve.
Mazhoranca po telekomandon votën e deputetëve opozitarë. Për herë të parë po flitet për sistemin zgjedhor pas shumë vitesh. Ata që dolën jashtë, janë në sintoni me shumicën, nuk duan ndryshim sistemi dhe nuk njohin deputetët e opozitës.
Nuk ka reformë me dy faza, hajde ta bëjmë brenda dhjetorit dhe të bëjmë depolitizimin e komisionerëve. Të hapim edhe listat nëse ju keni vullnet, dhe nëse keni këllqe të futeni në zgjedhje që këtë pranverë po të doni, dhe ne do të jemi gati të përfaqësohemi në ato zgjedhje”, tha ai.
Ndërkohë që drejtuesja e seancës, Vasilika Hysi i tërhoqi vëmendjen për gjuhën. “Ju tërheq vëmendjen për gjuhën jo etike. Nëse flisni për etikë, duhet të respektoni i pari etikën”.
