Pas ngjarjes së rëndë që ndodhi rreth orës 22:00 të mbrëmjes së të enjtes në zonën e ish-Bllokut në Tiranë, ku mbeti i vrarë truproja e Ervis Martinaj, ndërsa ky i fundit u plagos, ndërsa po ashtu i plagosur rëndë mbeti edhe Eljon Hato, Prokuroria ka ngritur grupin hetimor.
Ky grup drejtohet nga Elisabeta Imeraj ndërsa prokurorë janë Kreshnik Ajazi dhe Artan Lulo.
Martini, bashkë me Eljon Hato kanë mbetur të plagosur dhe janë transportuar në Spitalin e Traumës në kryeqytet, godina e të cilit është e blinduar nga forcat speciale të Policisë së Shtetit.
Prania në masë të madhe e tyre, duket se lidhet me dyshimin se situata mund të përshkallëzohet më tej, duke pasur parasysh se shënjestra e atentatorëve i ka mbijetuar të shtënave.
Ndërkohë, raportohet se edhe pranë shtëpisë së Ervis Martinit, pranë Rrugës së Elbasanit, ka një prani të madhe të forcave speciale të policisë, të cilat vëzhgojnë me imtësi lëvizjet në atë zonë.
Paraprakisht mësohet se dy të plagosurit janë jashtë rrezikut për jetën dhe po marrin ndihmën mjekësore, ndërsa i vdekur ka mbetur Fabiol Gaxha, 26 vjeç, i cili mendohet se punonte si truprojë i Ervis Martinit.
