Të gjithë e mbajmë mend shtrëngimin e zgjatur të duarve mes presidentit të SHBA-ve, Donald Trump dhe presidentit francez, Emmanuel Macron.
Por, si është raporti mes tyre?
Macron ka hedhur dritë mbi marrëdhënien e tij me Trump teksa ka folur për BBC, në “The Andrw Marr Show”. Presidenti i Francës tha se dy liderët flasin rregullisht dhe vazhdojnë të kenë shkëmbime të forta.
“Unë jam gjithmonë i drejtpërdrejtë dhe i sinqertë, po ashtu edhe ai. Ndonjëherë ia arrij ta bind për diçka, por ndonjëherë dështoj”, tha Macron teksa dha detaje për bisedat me Trump.
Macron shtoi se Trump ‘nuk ishte një politikan klasik’, ndërsa tregoi se mes tyre ka edhe çështje ku nuk bien dakord. E tillë është marrëveshja e Parisit për ndryshimet klimatike, nga e cila Trump u tërhoq.
Macron tha se SHBA-ja mundet vetëm të zgjedhë mes nënshkrimit ose mosnënshkrimit të traktatit, duke shtuar se “ne nuk do të negociojmë për një njeri”, raporton Tirana Today.
“Unë mendoj se ky është një gabim i madh, ia thashë atij që nuk do të ketë negociata të reja. Ti ose bashkohesh, ose nuk bashkohesh”, foli prerazi Macron.
Marrëveshja e Parisit nxit nënshkruesit për të reduktuar prodhimin e tyre të karbonit dhe për të mbajtur ngrohjen globale nën dy gradë Celsius deri në fund të shekullit. Ndërkohë, ish-presidenti Barack Obama e përshkroi atë si “shansin më të mirë që kemi për ta shpëtuar planetin tonë”.
Kështu, Shtetet e Bashkuara do jenë të vetmet që nuk do të nënshkruajnë marrëveshjen në vitin 2020.
‘Nuk është fjalë që mund të përdorni’
Macron gjithashtu e kritikoi Trumpin përdorimin e fjalës “shitholes” (vrima haleje), me të cilin përshkroi disa vende, ndërsa diskutonte emigracionin me ligjbërësit këtë muaj.
“Nuk është një fjalë që mund të përdoret”, tha presidenti francez, duke shtuar se duhen respektuar të gjitha shtetet.
Teksa u pyet se çfarë mendonte për postimet në Twitter të Trump, Macron u përgjigj se njerëzit nuk duhet ‘ta mbingarkojnë situatën’, teksa shpjegoi se postimet e tij janë një miks mes qëndrimeve personale dhe atyre politike. TIRANA TODAY
