Deputetja e Parlamentit Evropian, Ulrike Lunacek i ka bërë thirrje qeverisë së Kosovës që ta ratifikojë sa më shpejt të jetë e mundur marrëveshjen me Malin e Zi.
Eurodeputetja, e cila përfundon misionin e saj si një raportuese e posaçme për Kosovën në Parlamentin Evropian, zhvilloi një takim, ku tha se vonimi i ratifikimit të kësaj marrëveshjeje mund të ketë pasoja të mëdha për Kosovën, deri në mbylljen e dyerve nga Bashkimi Evropian.
“Tashmë topin e ka Kuvendi i Kosovës. I bëj thirrje shumicës ratifikuese që të marrin 2/3 e votave për këtë sepse është koha dhe ora po ecën. Mund t’ju them që nëse nuk ndodh ratifikimi, atëherë liberalizimi i vizave nuk do të bëhet. Nëse ndodh, atëherë ka mundësi të madhe që të bëhet liberalizimi i vizave. Nuk mund të them 100 përqind, por do të thoja 98 deri në 99 përqind që do të bëhet. Pra e vetmja mënyrë për të arritur liberalizimin e vizave është të ratifikohet marrëveshja”, tha Lunacek.
Më tej, eurodeputetja u tregua mjaft kritike me Thaçin, teksa tha se së fundmi po fajëson KE-në se ka vënë një kusht ndaj qytetarëve me marrëveshjen e demarkimit, ndërkohë që ai ka qenë ministër i Jashtëm ku ka nënshkruar marrëveshjen:
“Kur kam biseduar me presidentin tuaj dje, unë kam qenë shumë e sinqertë e hapur me të gjithë këtu. Së fundmi ai ka ngritur zërin në mediet e Kosovës dhe në mediet në mbarë BE, duke fajësuar Komisionin Evropian që ka vënë një kusht ndaj qytetarëve me marrëveshjen e demarkimit. I thashë shumë qartë se kjo nuk është e vërtetë. Ai ishte ministër i Jashtëm kur ka nënshkruar marrëveshjen. Ishte përgjegjësi e tij si ministër i kësaj Qeverie, që të sigurohet para se ta nënshkruajë atë dhe të shohë nëse do ta sigurojë shumicën apo jo. I kam thënë atij se fajësimi i BE nuk është mënyra për të ecur përpara. Është e kundërta, e kthen Kosovën pas. Sepse Komisioni Evropian dhe shtetet anëtare të BE do të thonë se ata e kanë nënshkruar atë, pse s’po e marrin përgjegjësinë për këtë?”
