Lulzim Basha po flet në Çadrën e Lirisë, ku akuzoi mazhorancën se ka ofruar qindra mijëra euro për regjistrimin në KQZ të partive të vogla, aleate me opozitën.
Gjithashtu, kreu i PD-së akuzoi Ben Blushin dhe Bamir Topin se kanë bërë pazar me krerët e aleancës qeveritare.
Basha bëri thirrje që më 7 maj të gjithë shqiptarët të shkonin në Kavajë, për të përmbysur Republikën e Vjetër.
Më poshtë fjala e Bashës:
Dje u luajt pazari i fundit i Republikës së Vjetër. Pazari tregon se sa poshtë ka rënë demokracia shqiptare, si është zëvendësuar mundësia e shqiptarëve për të vendosur me votë nga një kupolë kriminale, e cila është pasuruar mbi gjakun, djersën dhe taksat e shqiptarëve.
Dje, një grusht parazitësh që janë paguar me paratë e drogës, nxituan në shkelje totale të ligjit elektoral, të paraqisnin listat e kandidatëve pranë KQZ-së.
Ju duhet ta dini se Republika e vjetër, dje gjatë gjithë ditës dhe në orët e vona ofroi shuma të majma partive të vogla opozitare për regjistrimin në KQZ. 500 mijë euro iu ofrua vetëm 1 kryetari partie për t’u shkëputur nga opozita, e për t’iu bashkuar komplotit të qytetarëve.
Qindra mijëra euro iu ofruan kryetarëve të partive të tjera, ata thanë jo. Askush nuk e mori lugën e çorbës së prishur të Edi Ramës dhe Ilir Metës.
Arsyeja e mospranimit ishte e thjeshtë: “Këto para nuk janë paratë tuaja, këto janë paratë e shqiptarëve të papunë. Këto janë paratë e pacientëve shqiptarë, paratë e nxjerra me zor nga prindërit që paguajnë tarifat e rritura të arsimit të fëmijëve. Këto janë paratë e krimit dhe drogës, këto janë paratë e haramit që janë ndërtuar mbi fatkeqësinë e një populli të tërë, ne nuk i prekim këto para, do ju zënë frymën së shpejti. Ky ishte qëndrimi burrëror i aleatëve të Partisë Demokratike. Nuk është heriozëm, por detyrë ndaj do thoni pse kaq shumë falendërime. Sepse në tregun e ndyrë të Republikës së Vjetër vend ka për gjithçka përveç virtytit.
Nga ana tjetër, Ben Blushër, Bamir Topër hanë nga luga e çorbës së Edi Ramës. Ben BLushi, ose Sali Rexhepi është fasada e një pseudo opozite, makijazh për surratin e pamakiazhueshëm të Republikës së Vjetër është në gjunjë e gati të japë shpirt.
Është hera e fundit që unë merrem me ta, dhe këshilla ime është t’i harroni dhe përbuzni të shiturit, shushunjat që u gënjyen dhe u blenë me lekët e drogës në vend që t’i bashkoheshin kësaj kauze.
Data 7 maj, do të jetë data e atakut kardiak të Republikës së Vjetër. Më 7 maj në Kavajën e fisnikërisë, që u ngritën të parët kundër diktaturës me mizorë, Kavaja është në këmbë, Kavaja është e vendosur, por ndryshe nga 11 korriku, më 7 maj Kavaja nuk do të jetë vetëm. E gjithë Shqipëria do të jetë në Kavajë dhe me Kavajën dhe të bashkuar do t’i japim grushtin vdekjeprurës Republikës së Vjetër.
Asnjë fije bari nuk do të preket në Kavajë, por asnjë qytetar nuk do detyrohet në një farsë elektorale sepse një farsë të tillë nuk do të ketë më 7 maj dhe as më 18 qershor në Shqipëri.
Me aktin e djeshëm, me shkeljen e kodit zgjedhor, me derdhjen e milionave të grabitura nga shqiptarët, Republika e Vjetër firmosi aktin e saj të vdekjes.
