Manchester United dhe Mourinho janë rikthyer të marrin “frymë” lirisht, pasi kanë arritur të mposhtin Burnley në transfertë me rezultatin 2-0. Një hap fals në këtë sfidë mund të sillte shkarkim të trajnerit portugez, por ishte Lukaku që realizoi dopietë dhe e mbyllën me fitore një ndeshje mjaft të vështirë.
Një krosim në zonë nga Alexis Sanchez u kthye në gol mjaft të bukur në minutën e 27’. Pak përpara se të përfundonte pjesa e parë Lukaku dyfishon rezultatin dhe kompleton dopietën e tij të parë për këtë sezon me United.
Pjesa e dytë ishte mjaft e bukur dhe United kishte disa raste për të mbyllur ndeshjen, por Pogba ndalet nga Hart nga pika e bardhë e penalltisë dhe Lukaku sërisht shmang portierin dhe nuk e dërgon topin në rrjetë.
Ndëshkohet me karton të kuq Marcus Rashford pak më vonë pas një përplasjeje me një prej mbrojtësve të Burnley. Gjithsesi United nuk e kishte problem të ruante rezultatin në minutat e mbetura duke u rikthyer te fitorja.
Ndërkohë Tottenham, megjithëse ka dominuar ndeshjen gjatë 60 minutave të para duke gjetur edhe golin e avantazhit pas autogolit të Docoure, i rrëshqiti loja nga dora që pas golit të barazimit të Deeney duke pësuar edhe një gol tjetër nga Cathcart. Të besuarit e Pochettino-s kishin një ecuri të përsosur por e cila është thyer nga Watford, që arrin fitoren e 4-t në katër ndeshjet e para.
