Shqipëria dhe Izraeli do të përballen më 7 shtator në ndeshjen e parë të vlefshme për Ligën e Kombeve. Nuk ka kaluar shumë kohë që nga përballja e fundit mes këtyre dy kombëtareve vë tokën shqiptare dhe përpos humbjes ajo që do të mbahet mend më gjatë është terrori që iu bë tifozëve.
Ajo ndeshje u zhvillua në “Elbasan Arena” për arsye sigurie, pasi në Shkodër kishte zëra për një sulm terrorist dhe forca të shumta policie u bënë “zbor” tifozëve që shkuan për të ndjekur këtë sfidë. Masat ishin aq të rrepta sa grupi më i madh “Tifozët Kuqezi” vendosën që të mos ndjekin kombëtaren shqiptare për disa muaj kur ndeshjet zhvilloheshin në shtëpi dhe kështu ndodhi.
Edhe në këtë sfidë pritet që të ketë masa të rrepta sigurie dhe ata tifozë që do të sigurojnë një biletë do tu nënshtrohen kontrolleve të imtësishme, pasi pritet që të ketë sërish masa speciale. Shitja do të jetë në disa pika në qytete të ndryshme të Shqipërisë, në një kohë që prej disa javësh ka nisur edhe në faqen zyrtare të FSHF-së në internet.
