Pas Flamurtarit, Luftëtari mposht edhe Kamzën duke ruajtur një hap fitoresh për Europën. Në sfidën e parafundit të javës së 23-të të Kategorisë Superiore, ata kanë mposhtur në fushën e saj një rival direkt për Kupat e Europës siç është Kamza.
Një fitore minimale për gjirokastritët me shifrat 1-0, por që i jep tre pikë të arta që i ngjisin bluzinjtë në vendin e katërt në tabelën e renditjes.
Një gol i shënuar nga mesfushori Rapo në minutën e 69-të pas një goditje nga distanca, por që u ndihmua dhe nga një gafë e rëndë e portierit Gjonikaj, i cili nuk arriti të kontrollojë në mënyrë të duhur topin, i dha fitoren skuadrës së Hasan Likës.
Me këtë sukses gjirokastritët mbajnë vendin e katërt në tabelën e renditjes me 34 pikë të grumbulluara, ndërsa Kamza zbret në vendin e shtatë me 32 pikë të mbledhura. Java e 23-të mbyllet me sfidën e fundit që do të zhvillohet në orën 17:00 që do të jetë mes Vllaznisë dhe Flamurtarit që do të luhet në stadiumin “Loro Boriçi”.
