Rripi i Gazës për dekada ka qenë një arenë përplasjesh mes Izraelit dhe Palestinës. Edhe ditën e sotme nuk kanë ndaluar përplasjet. Në Gaza palestinezët marshuan me mijëra drejt kufirit me Izraelin, në atë që shënon fillimin e marshimit protestues 6-javor.
Të paktën 5 persona janë vrarë dhe 350 të plagosur, shumë prej të cilëve nga të shtënat e izraelitëve, raporton Ministria palestineze e Shëndetësisë
Ndërkohë, ushtria izraelite raportoi për “trazira” në 6 vendndodhje të ndryshme, duke shtuar se “po qëllonte vetëm në drejtim të nxitësve kryesorë”.
Palestinezët kanë ngritur 5 kampe pranë kufirit për të protestuar, në atë që është mbiquajtur “Marshimi i madh i rikthimit”.
Forcat izraelite të Mbrojtjes (IDF) thanë se janë grumbulluar rreth 17 mijë palestinezë në 5 pika të ndryshme përgjatë gardhit kufitar. Ato shtuan gjithashtu se trupat ishin “duke qëlluar nxitësit kryesorë” për të mundësuar shpërndarjen e trazirave, mes të cilave përfshihen edhe djegia e gomave apo hedhja e bombave molotov e gurëve ndaj rojeve kufitare. Megjithatë, IDF-ja njofton se “ka përforcuar zonën e mbyllur ushtarake” në vendngjarje, që rrethon Gazën.
Zyrtarët palestinezë të Shëndetësisë thanë se, përpara nisjes së protestës së kësaj të premteje, një fermer 27-vjeçar, Omar Samour, ishte vrarë nga zjarri i lëshuar nga një tank pranë Khan Yunis, e një tjetër ishte plagosur.
