Pak muaj më parë, në mars të këtij viti, Prishtina u trondit nga disa të shtëna me armë zjarri. Ngjarja u shënua në një hotel, fare pranë godinës së Kuvendit të Kosovës. Së fundmi, portali “Front Online” ka publikuar të tjera pamje nga skena e përplasjes me armë. Madje njëri prej personave të përfshirë në konflikt u lëndua në sy.
Për këtë rast, Prokuroria Themelore e Prishtinës, në veçanti Departamenti i Krimeve të Rënda ngriti aktakuzë në 11 tetor ndaj katër autorëve të dyshuar në këtë ngjarje.
Sipas aktakuzës së Prokurorisë, të pandehurit Remzi Beqiri, Labinot Beqiri dhe Fitim Doda më 26 mars 2019 rreth orës 23:40 , tek një hotel që gjendet në rrugën “Dem Ahmeti” në Prishtinë, pas një marrëveshje paraprake dhe në bashkëpunim edhe me dy persona tjerë, persona të panjohur për Prokurorinë, me dashje kanë dashur të ekzekutojnë të dëmtuarin Elvis Qupevaj për shkak të një konflikti të mëhershëm që kishin pasur, raporton “Front Online”.
Mediat në Kosovë e konsideruan skenën e regjistruar një “luftë”.
