Pas masakrës në Velipojë, ka ndodhur një incident i rëndë në Dhërmi. Për fat të keq, gjatë masakrës në Velipojë mbeten të vrarë katër persona dhe u plagosën dy të tjerë, për shkak të ndarjes në zonën e plazhit. Teksa u duk se kjo ngjarje e rëndë u la pas, një tjetër përplasje ka ndodhur në Dhërmi.
Gjatë natës, në Dhërmi janë djegur 60 shezlongë të një biznesi të vogël që operon në këtë plazh. Biznesi është në emër të Bilbil Domit, i cili sapo kishte marrë leje për shfrytëzimin e plazhit.
Djegia ka qenë e qëllimshme, dhe shkak është bërë një konflikt i mëparshëm midis bizneseve për shfrytëzimin e vijës bregdetare. Po ashtu të njëjtat burime bëjnë me dije se në zonë janë dëgjuar edhe të shtëna armësh. Këto të shtëna kanë qenë në një formë paralajmërimi, fill pas ngjarjes së rëndë që tronditi vendin në Velipojë.
Bilbil Domi, kishte vetëm 24 orë që kishte marrë lejen për shfrytëzimin e vijës bregdetare. 55-vjeçari mësohet se ka deklaruar në polici se nuk mundet që të fajësojë ndokënd, pasi nuk ka pasur përplasje me ndonjë person, por ka pasur pakënaqësi nga bizneset përreth. Më herët, Velipoja u trondit nga një shkëmbim me armë zjarri që u mori jetën 4 personave. Shkak i sherrit që solli masakrën ishte konflikti për hapësirën e rërës përpara hoteleve për vendosjen e shezlongeve.