Opinionisti Fatos Lubonja, i njohur si një ndër kritikët e ndërtimit të kullave të larta në Tiranë ka sulmuar ashpër edhe projektin e ri të Teatrit Kombëtar.
Teksa ka folur në News 24, ai tha se edhe në kohën e diktaturës për vepra të tilla kishte kundërshtime dhe zëra që thonin të kundërtën. Ky projekt sipas Lubonjës, është bërë në kundërshtim të plotë dhe në mungesë të plotë të transparencës për publikun.
“Edhe në kohën e Enverit kishte oponencë, merrej mendim më i gjerë, nuk vendoste një njeri i vetëm si tani”-u shpreh ai. Ai tha se mungesa e oponencës dhe veprimet e Ramës do të përfundojnë më keq se fati i Enver Hoxhës
“Atij i tërhoqën zvarrë statujat, këtë do ta tërheqin njerëzit të gjallë”- vijoi Lubonja.
“E para gjë që dua të komentoj nuk është projekti por është mënyra se si paraqitet projekti, në një zyrë të Kryeministrisë, një projekt që edhe në kohën e Enver Hoxhës ka pasur oponencë, ka pasur edhe konkurse, nuk emërohej vetëm. Ideja e konkursit ideja e konsultimit me publikun e shfaqjes së disa projekteve është gjeja e parë që kërkohet në një demokraci. Në Gjermani ishte një projekt nuk e di për një stadium, apo aeroport i Hitlerit u paraqit e doni kështu apo e doni ashtu. Dhe votoi me referendum populli i Berlinit. Pra bota përdor të tilla forma për këto projekte që janë kaq të rëndësishme. Ndërkohë që e gjithë shoqata e arkitektëve është kundër, ndërkohë që kushdo që flet jashtë skemave të Edi Ramës është kundër ne na imponohet me dhunë një projekt”-tha ai për Nevs 24.
Lubonja i njohur si një ndër opinionistët, që shpreh gatishmërinë për të ruajtur kujtesën historike, la të kuptohet se teatër më të mirë nuk mund të ketë.
“Nëse do mendimin tim më i bukur se ai ekzistuesi nuk mund të ketë. Ka histori, ka kulturë. Një anije skandinave nuk ka lidhje me një vend mesdhetar”-përfundoi ai.
