Nënkryetari i LSI-së, Luan Rama ka dalë para pak minutash në një konferencë për shtyp, ku denoncoi ngjarjen e ndodhur te gazeta “Koha Jonë”.
Disa punonjës të policisë shkuan në zyrën ku ndodhet gazeta me pretendimin se aty ishin vendosur disa shkallë emergjence pa lejen përkatëse.
Luan Rama i bëri thirrje kryeministrit të distancohet menjëherë nga kjo ngjarje, si dhe kërkoi që të nisin hetimet lidhur me ngjarjen.
FJALA E LUAN RAMËS:
Jam këtu për t’u solidarizuar me ekipin, drejtuesin dhe pronarin e gazetës “Koha Jonë”. Duke iu siguruar mbështetjen, dëshiroj të denoncoj këtë skenar të papërgjegjshëm, dhunën e ushtruar ndaj pronarit dhe disa punonjësve si dëshmi i degradimit të vazhdueshëm të këtij pushteti, pasi arroganca për të goditur lirinë e fjalës dhe shtypit është padyshim arrogancë kriminale.
Veprimi i Policisë së Shtetit është tërësisht i paligjshëm dhe fatkeqësisht kjo nuk është hera e parë e kësaj sjellje. I bëj thirrje kryeministrit të vendit të distancohet dhe të marrë masat ndërsa prokuroria të nisë hetimet. E ftoj edhe një herë kryeministrin të distancohet dhe të mbajë qëndrim të prerë për të ndëshkuar cilindo që ka ushtruar dhunë ndaj pronarit të gazetës “Koha jonë” dhe punonjësve të saj.
Kjo është dhunë ndaj lirisë së fjalës, shprehjes dhe të shtypit./ Tirana Today
