Nënkryetari i LSI-së Luan Rama, në vazhdën e denoncimeve të kësaj selie, drejtoi sulmin nga Bordi i Monitorimit të Medies. Në një deklaratë të publikuar në FB, ai argumenton se ky organizëm, pa asnjë të drejtë ligjore e madje në tejkalim të tagrit ligjor, ka gjykuar sjelljen e medies audio-vizive në ditën e zgjedhjeve.
“BMM është shfaqur sot si një lavatriçe e imazhit të Rilindjes”, shprehet Rama, duke kujtuar se në nenin 71 pika 1 të Kodit përcaktohet se “fushata zgjedhore fillon 30 ditë para datës së zgjedhjeve dhe përfundon 24 orë para datës së zgjedhjeve dhe nenin 85 të Kodit ku shkruhet: KQZ 40 ditë para fillimit të fushatës zgjedhore ngre Bordin e Monitorimit të medies i cili ka për detyrë monitorimin e zbatimit të dispozitave të këtij Kodi përgjatë fushatës zgjedhore”.
Ai thotë se sot në ditën e zgjedhjeve, Bordi nuk ka asnjë tagër ligjor, sepse dita e votimit nuk është objekt i monitorimit nga ana e tij.
“Nga ana tjetër, gazetarët, reporterët dhe kronikanët kanë për mision të raportojnë për çfarë ndodh dhe nga ky mision atë nuk mund ta detyrojë asnjë ligj, asnjë bord e asnjë rilindas të heqë dorë”, vë në dukje Luan Rama.
