Shteteve të Bashkuara të Amerikës vijojnë të jenë vendi i ëndrrave për mijëra njerëz, jo vetëm në Shqipëri, por edhe në vendet e tjera të botës. Shifrat sa i përket plotësimit të lotarisë amerikane sa vijnë dhe shtohen nga viti në vit.
Ëndrra për një jetë tjetër në një kontinent kaq të largët, është përqasja e shumë njerëzve në të gjithë globin. Shifrat tregojnë se shqiptarët shënojnë rekord në Evropë për marrjen e lejeve të përhershme të banimit (green card) gjatë dhjetë viteve të fundit, kjo e matur me raportin e popullsisë.
Instituti i Politikave të Migrimit në Shtetet e Bashkuara të Amerikës ka përditësuar të dhëna për fluksin e lejeve të reja të përhershme të banimit për të gjithë vendet e botës gjatë periudhës 1999-2015.
Shqiptarët, që nga viti 1999 kanë marrë leje të përhershme të banimit në Amerikë, 77,618 persona, ku numri më i lartë është shënuar në vitin 2006, me me 7,916 persona, ndërsa më i ulëti është në vitin 2003 ishte me 3,362 persona, por në vitin 2015 ka shënuar 4,653 persona.
Instituti i Politikave të Migrimit sqaron se të dhënat përfshijnë personat që kanë marrë leje ligjore të përhershme të banimit në vitin e dhënë fiskal, pavarësisht nga data aktuale e mbërritjes së tyre.
Monitor ka përpunuar të dhënat e Institutit të Politikave të Migrimit për dekadën e fundit (2005-2015) për të gjitha shtetet e Europës. Nga të dhënat e përpunuara rezulton se në një dekadë, kanë marrë Green Card në SHBA rreth 54 mijë shqiptarë, duke u renditur në vlerë absolute në vend të gjashtë, pas Mbretërisë së Bashkuar, Ukrainës, Federatës Ruse, Polonisë dhe Gjermanisë.
“Por, duke pasur parasysh që shtetet e sipërpërmendura kanë një popullsi shumë herë më të lartë sesa të Shqipërisë, vendi ynë mban rekord në numrin e Green Card të përfituara në dekadën e fundit, në raport me madhësinë relative. Përfituesit shqiptarë të lejeve të përhershme të qëndrimit në shtetin e ëndrrave në gjithë dekadën e fundit përbënin 1.85% të totalit të popullsisë, që kishte Shqipëria në 2015-n. Kjo përqindje është shumë më e lartë sesa e vendit të dytë që renditen pas nesh, atij të Bosnjë Hercegovinës, me 0.7%”-shkruan Monitor.al
Bosnja ka pasur një fluks të lartë të marrjes së Green Card deri në vitin 2005, kur shteti boshnjak po merrte veten nga pasojat e luftës shkatërrimtare, më pas kërkesa ka rënë, për të arritur në vetëm 860 në 2015-n.
Në rajon Shqipëria kryeson dukshëm për numrin e green card që merren çdo vit. Në 2015-n maqedonasit morën 1060 lekë, malazezët 251, serbët 866, shtetasit nga Kosova 814.
