Në prag të ndeshjes Skënderbeu-Partizani i Beogradit që do të zhvillohet në “Elbasan Arena”, lojtari serb Zoran Tosic, që ka një karrierë të pasur, kujton episodet që ndodhën në ndeshjen e dy viteve më parë dhe beson se tension do të ketë edhe në këtë të sotmen.
Sulmuesi anësor Tosic pretendon se atmosfera në “Elbasan Arena” nuk do të jetë aq miqësore duke iu referuar episodit kur një tifoz goditi autobusin e skuadrës serbe në Shqipëri.
“Në Elbasan do të jetë atmosferë e zjarrtë. Kjo është një ndeshje ku duhet ta kesh mendjen vetëm te fitorja, ndaj duhet të jemi të qetë. Është e rëndësishme të përqendrohemi te futbolli dhe të mendojmë vetëm për fushën e lojës. Mbaj mend në Shqipëri-Serbi që kishte shumë presion. Para ndeshjes u godit me gur edhe autobusi ynë. Atëherë ne të gjithë u izoluam nga gjithçka, mbyllëm veshët, ndaj dhe fituam 2-0. Kjo ndeshje duhet trajtuar si çdo tjetër”, ka thënë Tosiç për “Blic”.
Portieri i Partizanit të Beogradit, Vladimir Stojkoviç, ka qenë në fushë në sfidën kur Serbia luajti në Elbasan dhe fitoi 2-0. “Kam menduar gjëra shumë të mira pas asaj ndeshjeje në Elbasan. Kemi ngelur shumë të kënaqur nga ajo ndeshje. Megjithëse asnjë skuadër nuk kishte objektiva, kemi bërë një ndeshje të fortë. Pres të njëjtën atmosferë. Do të hyjmë në fushë për fitore dhe mendoj se i kemi të gjitha mundësitë për ta arritur. Futbolli bashkon dhe afron”
