E ardhmja e Mërgim Mavrajt sa vjen dhe bëhet më e qartë dhe duket se ai ka arritur akordin me klubin grek, Aris të Selanikut. Pavarësisht se asgjë nuk është bërë zyrtare duket se qendërmbrojtësi i kombëtares shqiptare, pas shkëputjes së kontratës me Hamburgun do të vazhdojë karrierën e tij në futbollin grek.
Kiriakos Papadopulos, ish-shok skuadre me Mavrajn tek Hamburgu, që dy sezone më parë krijuan një dyshe në mbrojtje për tu pasur zili ka folur për kalimin e shqiptarit tek Aris:
“Ai është një përforcim i mirë, ka eksperiencë, ka luajtur në kombëtaren e Shqipërisë prej shumë vitesh dhe ka eksperiencë në Gjermani. Ai do të ishte një ndihmë e jashtëzakonshme për skuadrën e Aris dhe një lojtar i madh për futbollin grek. Ai e njeh futbollin, është shumë i fortë në duele, do të jetë e lehtë për të të dallohet në kampionatin grek, për këtë jam i sigurt.
Sa i përket karakterit, është një person i mirë, i qetë. Ai punon shumë. Të them të drejtën jam i çuditur që zgjodhi kampionatin grek. Për të mbërritur në kampionatin grek me siguri që do të ketë pasur një ofertë të mirë. Gjithsesi, e them që është një futbollist i mirë”.
