Në SHBA tashmë është bërë “virale” kjo video, në të cilën një sportist i NFL i afron te hunda gazetares televizive, pa e pasur fare mendjen kjo e fundit, një rrip pambuku me amoniak. Reagimi i reporteres, të zënë në befasi, është i menjëhershëm. Kjo është videoja më e shikuar e javës në SHBA.
Larry Fitzgerald, lojtar i Cardinals Arizona, synoi të bëjë shaka me Pam Oliver, gazetaren e “Fox Sports”, e cila ishte në transmetim të drejtpërdrejtë, por era e fortë e amoniakut bëri të kundërtën, e irritoi këtë të fundit. Në Botërorin e Rusisë, ishin mediat gjermane, ato që ngritën akuza se lojtarët e kombëtares mikpritëse po përdornin substanca të jashtme.
Sipas tyre, lojtarët rusë kanë përdorur herë pas here amoniak, një substancë që duhet të jetë e ndaluar, pasi ndikon në paraqitjen sportive. Një gazetë e përjavshme e Mynihut shkroi se, në ndeshjen kundër Spanjës, një nga zëvendësuesit e hedhur në fushë nga trajneri Cerceshov ka thithur amoniak nga një copë pambuku.
Ndonëse amoniaku nuk është një substancë e pranishme në listën e substancave të ndaluara nga Agjencia Ndërkombëtare e Antidopingut (WADA), ai stimulon frymëmarrjen dhe përmirëson qarkullimin e oksigjenit në gjak.
