Deputeti socialist, Erion Braçe, ka treguar se çfarë përballje të fortë ka patur me sipërmarrësit e lojërave të fatit. Në një intervistë për “Kafein”, ai ka pranuar se ka marrë edhe kërcënime, pas propozimit të mazhorancës për t’i mbyllur deri në fund të këtij viti aktivitetin e lojërave të fatit. Kreu i Komisionit të Ekonomisë, ka rrëfyer se po ushtrohet presion ndaj tij nga sipërmarrësit, duke i dërguar çdo ditë nga 20-25 mesazhe në celular.
“Nuk ka ditë që nuk marr 20-25 mesazhe nga njerëz të kësaj industrie në këtë vend. Janë kthyer në sms të neveritshme, dhe që ushtrojnë presion mbi deputetin e Kuvendit me lloj -lloj formash.
Ata nuk mund të më presionojnë, pasi secili që ka shkruar, ka marrë përgjigje të qartë. Pra mbyllja e të gjitha aktiviteteve të basteve sportive.
Mbyllja e aktiviteteve të basteve sportive, lojërave online, nëpër lagje etj. Ajo që kam propozuar është se shteti që do vendosë, si do organizojë këtë aktivitet në rast se do ekzistojnë. Edhe kazinotë duhet t’i nënshtrohen një tatimi të ri.
Me ligj, kazinotë duhet të zhvendosen nga zonat e banuara. Nuk jam dakord me tatimit që kanë. Kam parë normat e fitimit të tyre, dhe jam i llahtarisur. Arrijnë deri në 49%. Me këto norma duhet një tatim mbi fitimin e tyre, dhe thuajse konfiskues”, tha Braçe.
