Shqipëria luan mirë, por nuk mjafton pasi është mposhtu nga Izraeli në Ber Sheva me rezultatin 2-0 dhe tashmë llogaritë në Ligën e Kombeve mund të quhen të mbyllura. Kuqezinjtë thyhen sërish, por këtë herë mund të themi se dhanë gjithçka dhe ishte një humbje që dhemb dhe jo si në Skoci ku përpjekjet dhe loja ishin të një niveli të ulët.
Në momentin më të mirë për kuqezinjtë, ku Balaj me pak më shumë fat mund ta dërgonte në rrjetë atë top të goditur me kokë, vjen ndëshkimi. Top i gjatë nga portieri, Hemed në mesfushën tonë nuk mbulohet nga askush dhe gol, i çuditshëm, i pabesueshëm. Shpesh në futboll mjafton kaq për të prishur gjithçka, sepse më pas duhet të bësh sforcim të madh për të reaguar.
Të besuarit e Panuccit hidhen në sulm dhe japin dyfish nga vetja e tyre, dominimi ishte i qartë me 70% të kontrollit të topit, por edhe pasimet dhe gjuajtjet ishin dy apo trefish më shumë. Por goli nuk erdhi. Nuk erdhi, për faktin se nuk jemi kombëtare që prodhojmë sulmues dhe për faktin se ata që dinë të shënojnë, si Sadiku, apo Cikalleshi e Roshi, nuk janë në kombëtare, ndërsa Balaj është shumë larg ditëve të tij më të mira.
Izraeli bëri pak, po mori 3 pikët, fundja aq i duhej. U shpërblye, sepse në Elbasan luajti më mirë se ne dhe mori 0 pikë. Këtë radhë izraelitët bënë gjithçka mirë, na shënuan në fund golin që mbylli gjithçka dhe… natën e mirë. Kualifikimi? Më mirë le të mendojmë për të mos zbritur në Ligën D…
