Azdren Llullaku kompletoi transferimin tek ekipi italian, Virtus Entelës në Serinë B, pasi ishte mbyllur merkato e transferimeve. Por një prapaskenë mjaft interesante e shoqëron këtë transferim, pasi sulmuesi i kombëtares ka bërë një sakrificë të madhe duke anuluar ceremoninë e dasmës me partneren e tij Roksanën. Këtë detaj e ka zbuluar kryetari i bashkisë së Tarzos në Itali, qytezë ku sulmuesi jetoi shumë vite si emigrant.
Në një prononcim për mediat vendase, Vinçento Saket nuk ngurroi t’i thurte elozhe shqiptarit duke u shprehur: “Llullaku u largua nga lufta bashkë me mamanë dhe vëllain e tij. Janë sjellë gjithmonë mirë dhe të gjithë i deshën shumë që në ditën e tyre të parë këtu në Tarzo. Unë e ndjek Azdrenin fillimisht si i apasionuar i futbollit, më shumë sesa si një kryetar bashkie.
Nuk e kanë të gjithë në qytezën e tyre një djalë i cili luan në Kombëtare dhe prej pak kohësh u kthye në Itali për të luajtur në një skuadër të Serisë B.
Ai është një djalë i thjeshtë, i cili ka vuajtur dhe e njeh mirë fjalën sakrificë. Unë do të kisha celebruar dasmën e tij në javën e kaluar, por ai shtyu gjithçka për shkak të nënshkrimit të kontratës së re”, shpjegoi kryebashkiaku.
Llullaku i dha fund përfundimisht eksperiencës në kampionatin kazakistanës, ku më parë ishte aktivizuar me Astanën, Tobolin dhe së fundmi ishte shumë pranë marrëveshjes me Ordabasin.
