Ministri i Brendshëm, Sandër Lleshaj ka pasur një përplasje sot me deputeten e LSI-së, Kejdi Mehmetaj në seancë dëgjimore në Komisionin e Medias.
Lleshaj nisi të fliste lidhur me një shkresë që universitetet kishin dërguar, ndërsa në këtë moment ka ndërhyrë Kejdi Mehmetaj. Kjo e fundit i tha ministrit:
“Ku e ke shkresën? Nxirre ta shohim”, ndërsa përgjigja e ministrit ishte:
“Me ty flas kur të mbarosh universitetin”. Kaq ka mjaftuar që në Komision të ketë reagime të shumta, ndërsa drejtuesja Albana Vokshi i ka tërhequr ministrit vëmendjen, si dhe ka dënuar mosreagimin e anëtarëve socialistë për deklaratën e Lleshajt.
“Këtu s’jeni për t’u marrë me diplomën time. Unë jam e zgjedhur e popullit, ndërsa ju një i vendosur për t’i shërbyer interesave të kryeministrit”, ia ktheu Mehmetaj ministrit të Brendshëm Lleshaj.
