Update/Adriatik Llalla, ish-Kryeprokurori i Republikës ka hasur për herë të parë në një pengesë të fortë institucionale për dorëheqjen e tij nga vetting.
Kolegji i Posaçëm i Apelimit po vijon shqyrtimin e ankimimit të Komisionerit Publik, pra gjytqarit të vettingut, i cili e cilësoi të padrejtë vendimin e marrë nga KPK për ndërprerjen e vettingut ndaj ish-kryeprokurorit.
Komisioneri Publik, Florian Ballhysa tha se Adriatik Llalla si si magjistrat nuk ka ndjekur procedurën ligjore të dorëheqjes.
Ndërkohë, avokati Sokol Hazizaj kundërshton dhe kërkon lënien në fuqi vendimin e Komisionit të Pavarur të Kualifikimit.
Vetë Llalla nuk ndodhet në Shqipëri, por nga Turqia ka dërguar një prokurë përfaqësimi për avokatin Hazizaj.
Qëndrimi i Komisionerit Publik në fakt përbën një qëndrim të fortë, pasi sipas institucionit të vettingut, nuk mundet që ish-kryeprokurori të largohet lehtë pa hyrë në një sistem ku sipas Kushtetutës përfshihen të gjithë subjektet e drejtësisë; pra gjyqtarët e prokurorët.
Kolegji i Apelit është tërhequr për të marrë vendim, të cilin e ka bërë të ditur se do ta shpallë të hënën e ardhshme.
Taksirati i Llallës/A është nënshkruar dorëheqja e dërguar me postë?
Në Kolegjin e Posaçëm të Apelimit ka nisur seanca për ish prokurorin e Përgjithshëm Adriatik Llalla, lidhur me procesin e rivlerësimit ndaj tij.
Vetë Llalla nuk ka qenë i pranishëm por përfaqësohet nga avokati i tij Sokol Hazizaj. Komisioneri publik Florian Ballhysa kërkoi prishjen e vendimit të KPK për Llallën, për ndërprerje të procesit të rivlerësimit.
Sipas komisionerit, Llalla është ende magjistrat, pasi sipas tij dorëheqja e ish kryeprokurorit nuk është shprehur përmes formës dhe procedurës ligjore, prandaj është nul.
“Pa u materializuar dorëheqja në formën e procedurën e parashikuar në ligj nuk mund të prodhojë asnjë efekt juridik, qoftë ky dhe ndërprerja e procedurave të vlerësimit kalimtar. A është nënshkruar nga vetë magjistrati dorëheqja kur dorëheqja është bërë me postë? Ditën që mbaron mandati i institucionit të rivlerësimit, gati 4 vite më pas nga dita e sotme që po zhvillohet ky gjykim, ai ka gjithë të drejtën të kërkojë rikthimin në sistem duke mos e kaluar kurrë kështu procesin e rivlerësimit”, tha Ballhysa.
Ndërkohë avokati i Llallës, Sokol Hazizaj thotë se komisioneri nuk iu referua argumenteve të seancës së mëparshme.
